Облыстық «ҚЫЗЫЛОРДА» телеарнасы туралы мәлімет


        «Қызылорда» телеарнасы – Тәуелсіздіктің төл құрдасы. Аймақ айнасы– 1991 жылдың 30 сәуірінде 30 минуттық хабармен тұңғыш рет эфирге шықты. Келесі 1 мамыр күні қаланың орталық алаңынан мерекелік демонстрациядан 45 минуттық тікелей репортажбен жұмысын жалғастырып, бүгінге дейін тоқтаусыз эфир таратуда.

        Филиал тарихындағы ең алғашқы басшы-ұзақ жылдар бойы облыстық радионы басқарған, «КСРО –ның құрметті радисі» Жақсылық Бекқожаев болды. Одан кейін телеарна тізгінін кейіннен екі мәрте ҚР Парламенті Мәжілісінің депутаты болып сайланған Әбдіжәлел Бәкір ұстады (1991-1995 жж). 1996-2005 жылдар аралығында телеарнада 3 басшылық ауысты. 2005 жылдан бастап «Қазақстан» РТРК» АҚ Қызылорда облыстық филиалына Жағыппар Аманжолұлы Қарабала басшылық етеді.

        Жергі¬лікті телеарна өз кәсібіне адал, мамандығын шын сүйетін 75-ке жуық кәсіби маман жұмыс жасайды. Тәулігіне 15 сағат хабар таратылымын облыс халқының 98 пайызы көре алады. Ал, цифрлық хабар тарату 80 пайызды құрайды, ал 2022 жылдың 1 шілдесінде ол 100 пайызға жетеді деп жоспарланып отыр.

        Жаңалықтар тәулігіне 10 рет, оның ішінде 6 рет тікелей эфирге шығып, аймақ және ел ақпараттарымен хабардар етсе, аптасына түрлі тақырыптағы және форматтағы 32 хабар көрермен назарына ұсынылады. Тікелей эфирдегі ток–шоулар, өзіндік музыкалық контент, телекөпірлер, аймақтың кез-келген нүктесінен жедел хабар тарату, оперативтілік, шыншылдық аймақ телеарнасының масс медиа саласындағы беделін айшықтай түседі. Бүгінде тікелей эфирдегі «Өмірдің өзі...», «Өзекжарды», «Ұлт саулығы», «Қайырлы күн, Қызылорда!» хабарлары мен ақпараттық –сараптамалық «Үштаған» бағдарламасы көрермендер тарапынан өзінің лайықты бағасын алып, ықыласына бөленуде. Өзіндік өнім үлесі 71,9 пайызды құрайды.

        Ғимарат аумағы 2700 шаршы метр, 3 және 4 қабатты 2 блоктан тұрады. Аумағы 186 ш.м.болатын қойылымдық хабарларға арналған түсіру павильоны бар. Өткен жылы «11 студия», «Үштаған» хабарларының декорациясы жаңаланды. Соңғы үлгідегі 4 робот камералармен және 9 кеңформатты монитордан тұратын бейнеқабырғамен жабдықталған Жаңалықтардың жаңа студиясы пайдалануға берілді. Телеарнаның техникалық әлеуеті маңызды саяси және мәдени шараларды оқиға орнынан HD форматында онлайн және тікелей таратуды жүзеге асыруға мүмкіндік береді. Хабарлар соңғы телевизиялық техникамен жабдықталған бірнеше монтаждау аппараттарында әзірленеді.

        «Қызылорда» телеарнасының өзге облыстық филиалдардан ерекшелігі халық шығармашылығын дамыту мен жергілікті музыкалық контентті қалыптастыруға айрықша басымдық беруі. Бүгінде балалар мен жасөспірімдер шығармашылығына арналған «Ботақан» телефестивалі, «Таңшолпан», жастардың эстрадалық орындаушылық шеберлігін танытып жүрген «Сыр жұлдыздары» ән байқаулары мен дәстүрлі ән мен күйді, фольклорлық музыканы насихаттаушы «Жыр керуен» мен «Асыл мұра», «Сыр сүлейін сұрасаң...», «Ғасырлар үні» сынды тағылымды музыкалық жобалары өз өміршеңдігімен құнды.

       Ал телеарнаның төл жобаларында тұсауы кесілген өнерлі жастардың бірқатары бүгінде қазақ эстрадасының жарық жұлдыздарына айналған. Олар - Гүлнұр Оразымбетова, Мәдина Сәдуақасова, Алмас Кішкенбаев, Өмірқұл Айниязов, Гүлхан Сіргебаева, Ербол Шәріпов, классик әншілер Бибігүл Жанұзақ, Тахауи Рахметовтер. Қобыз үнін көмейіне қондырған қызылордалық талантты жас, «Қазақстан дауысы» жобасының жеңімпазы Құралай Мейрамбектің де өнерге алғашқы қадамы телеарна ұйымдастырған «Ботақан» байқауынан бастау алған.

      Телеарна бәйгеге қосқан хабарлар халықаралық, республикалық, облыстық додаларда жүзден жүйрік шығып, жеңімпаз атанып келеді. Атап айтсақ, 2019 жылы «Тұңғыш Президент және Тәуелсіз Қазақстан» атты халықаралық байқауда журналист Бекзат Есқалиевтың хабары жүлделі

2 орынды, БАҚ арасында өткен ұлттық байқауда журналист Алтынай Молжанованың «Таза ғаламшар» хабары «ТВ-дағы ең үздік бағдарлама» номинациясы бойынша бірінші орынды , 2020 жылы республикалық «Қайырымдылық керуені» байқауында журналист Толқын Қабылшаның «Өмірдің өзі» бағдарламасы Гран приді иеленді. Сондай-ақ, қызметкерлеріміз «Қазақстан» РТРК АҚ филиалдары арасында өткізілген кәсіби шығармашылық байқаулардың да жеңіс тұғырынан көрініп жүр.

Аймақ айнасы - білікті мамандардың ұстаханасына айналған. Телеарнадан түлеп ұшқан 50-ден астам талантты телеоператорлар мен жас журналистер республиканың беделді БАҚ-да қызмет жасауда.

   Мамандарының шығармашылық потенциалы және қаржылық әлеуеті, өзін-өзі қамтамасыз етуі жағынан көш басында келе жатқан «Qyzylorda» телеарнасы республикадағы 14 филиал ішінде алғашқы үштіктен түсіп көрген емес. Алдағы уақытқа да қойылған меже биік, мақсат айқын.

Ол-көрермендерімізге қалтқысыз қызмет етіп, телеарна рейтингін жоғары көтеру.