Облыс орталығында мұғалімдердің дәстүрлі спартакиадасы өтіп жатыр. Биыл бесінші мәрте ұйымдастырылған спорт додасына ел аумағынан 17 команда қатысып, өзара сынға түсуде.
Былтыр Тараздағы турнирде топ жарған қызылордалық ұстаздар кезекті спартакиаданы Сыр топырағында өткізу құқығын жеңіп алған еді. Міне, араға жыл салып байрақты бәсеке біздің өңірде жалауын желбіретті. 14 облыс пен Астана, Алматы, Шымкент қалаларынан командалар жасақталып, салауатты өмір салтын қалыптастыруда белсенділік танытуда. Мыңға жуық мұғалім спорттың бес түрі бойынша бақ сынап жатыр.
ФАРХАД ДОСАЕВ – ЖАРЫСТЫ ҰЙЫМДАСТЫРУШЫ
// Бұған дейін төрт рет өткізілді. Қызылорданың ұстаздары төртеуінде де биік тұғырдан көрінді. Бірінші жылы үшінші орын алса, екінші жылы да үшінші орын алды. Одан кейінгі жылы екінші орын алып, былтыр бірінші орынды жеңіп алдық. Біз осы жарысқа тыңғылықты дайындалдық. Енді командаларымыз сақадай сай десек болады. Бізге тек жол қатынасына байланысты Павлодар, ШҚО, Қостанай қалалары келе алмай қалды. Қалған облыстардың бәрі қатысып отыр//
Спартакиадада командалар волейбол, футзалдан сайысқа түсіп жатыр. Сондай-ақ, жарыс тізімінде ұлттық спорт түрлері де бар. Епті ұстаздар бесасық ойнаса, мергендері асық атады. Ал, жүйрік ойлы оқытушылар тоғызқұмалақ ойынынан өзара мықтыны анықтайды.
ФАРХАД ДОСАЕВ – ЖАРЫСТЫ ҰЙЫМДАСТЫРУШЫ
//Алдағы уақытта ұлттық ойындарымызды көптеп қоссақ деп жатырмыз. Сонымен қатар, келесі жылы АӘД пәндерінің мұғалімдері арасында 3 түрін қоссақ деген ұсыныс, пікірлер бар. Олар, мылтықты ату, оны шашып жинау сосын өздерінің арнайы киімдерін киіп-шешуден арнайы жарыстарды қоссақ деп жатырмыз//
Жарыстар «Евразия», «Мұз айдыны» спорт кешенідері мен жаңадан ашылған теннис орталығы, №2 жасөспірімдер спорт мектебінде қатар өтіп жатыр. «Шынықсаң, шымыр боласың» деген ұранды ұстанған ұстаздардың спортқа деген құлшынысы жоғары.
САМАТ АЛДАБЕРГЕНОВ – МАҢҒЫСТАУ КОМАНДАСЫНЫҢ ЖЕТЕКШІСІ // Біз Маңғыстау облысынан келдік, барлық түрінен қатысамыз, 72 спортшымызды алып келдік. Осымен біз спартакиадаға 3-ші мәрте келіп тұрмыз. Құрамда өзгерістер бар, деңгейі жоғары. Осы ойынға біз жақсы дайындалдық. Жақсы орын аламыз деген үміттеміз//
Дүбірлі дода 2-қарашаға дейін жалғасып, жеңімпаздар мен жүлдегерлердің есімі сол кезде белгілі болмақ. Айта кетейік, бірінші орын жүлдегеріне 700 мың теңге, екінші орынға 500 мың, ал, қола жүлдеге 300 мың теңге табысталады.