Тазалық – баршаға ортақ міндет. Алайда облыс орталығында санитарлық талаптарға немқұрайлы қарап, нысандардың сырт келбетіне мән бермейтін кәсіп иелері бар. Осыған орай қала әкімдігі жанынан құрылған жұмысшы топ бірлескен профилактикалық іс-шара жүргізді.
«Универсам» мөлтек ауданындағы көлік жүруге арналған жолдар «жабайы» сауда орнына айналған. Бей-берекет қойылған тауарлар көлік жүргізушілерінің жүріп-тұруына кедергісін келтіріп отыр. Мұнан бөлек, құрылыс қалдықтарын тастап, тоз-тозы шыққан жарнамалық белгілерді елемей жүрген кәсіп иелері бар. Рейд барысында жұмысшы топ нысан иелеріне ескерту жасап, апта көлемінде жағдайды қалыпқа келтіруді тапсырды. Сонымен қатар, дүкен иелеріне нысанның алдында жатқан қоқыстарды тазартып, ауланы ұқыпты ұстау керектігін қаперге салды. Алдағы уақытта халық көп шоғырланған орындарда мұндай рейдтер жиі ұйымдастырылатын болады.