#qyzylordatv #news #қызылорда #жаңалықтар
Шағын және орта кәсіпкерлік – ел экономикасының драйвері. Сондықтан, өңірде макро және микробизнесті ілгерілету маңызды. Бұл ретте кәсіпкерлерге жан-жақты қолдау көрсетілуі тиіс. Аймақ басшысы бизнес өкілдерімен кездесуінде осы мәселені көтеріп, бірқатар тапсырма берді.
Кеңейтілген жиынға облыстағы барлық деңгейдегі әкімдер мен мемлекеттік мекеме басшылары қатысты. Күн тәртібінде бір ғана мәселе. Аймақта кәсіпкерлікті дамыту бағытында атқарылып жатқан жұмыстарды саралау. Облыс әкімі алдымен ақжолтай жаңалығын жеткізді. Биыл республикалық бюджеттен өңір экономикасына қосымша қаржы бөлініп, бірқатар кешенді жобалар жүзеге аспақ.
Мұнан соң жиынға қатысқан бірнеше кәсіпкер өздерін алаңдатқан мәселелерді ортаға салды. Осылайша, күрделенген кедергілердің шешімін жауапты сала мамандарынан сұрап көрді. Облыс әкімі өз кезегінде кәсіпкерлікті қолдау жұмыстарын жүйелі ұйымдастыруды тапсырды.
Кәсібіне қолдау іздеп келгендердің қатарында шаһардағы шыны зауытының да өкілдері бар. Олар зауыт қызметкерлерінің 25 пайызын шетелдік мамандардан жасақтағысы келетіндерін жеткізді.
Өңірде кәсіпкерлік көкжиегін кеңейту мақсатында әкімдік тарапынан жан-жақты қолдау көрсетіліп келеді. Бизнес өкілдерінің заңды мүддесін қорғау бойынша да жұмыстар қарқынды жүргізілуде. Мәселен, өткен жылы облыстық прокуратура 1300-ден астам кәсіпкердің құқығын қорғаса, осы жылы 20 кәсіпкерден өтініш келіп түскен. Сондай-ақ, биыл бизнес субьектілерінің арыз-шағымын реттейтін телеграм-бот іске қосылды.
Жиын соңында облыс әкімі Нұрлыбек Нәлібаев шағын және орта бизнесті дамытуға айрықша басымдық беруді тапсырды.