#qyzylordatv #news #қызылорда #жаңалықтар #түйешаруашылығы#қармақшы
Шаңырақтың шамын, төрт түліктің бабын тапқан аяулы жанның бірі - Айжамал Нақыпова. Ол Қармақшы ауданы, Қармақшы ауылында тұрады. 12 жасында-ақ түйе сауып, шаруаның қыр-сырына қаныққан. Қазір жолдасымен бірге Ойсылқара тұқымын өсіріп, атакәсіпті жандандырып жатыр. Тақырыпты тілшіміз Қозы Көрпеш Жасаралұлы тарқатады...
«Малды баға білсең, бабын таба білсең, берекелі болады». Байқазақовтар отбасының ұстанымы осы. Айжамал Жұмаханқызы отыз жыл бұрын отағасымен атакәсіпті бастаған. Бүгінде сайын далаға төрт түлікті түгел өргізген. Солардың ішінде, түйе шаруашылығына ерекше екпін беріп отыр.
АЙЖАМАЛ НАҚЫПОВА – САУЫНШЫ // Менің түйелерім қасына келіп, жылы сөйлейсің ғой. Жылы сөйлемесең бұлар да жақтыра бермейді. Ренжігенді, ұрысқанды жақтырмайды. Мысалға, ақмаңдай дейміз, ақбақай дейміз. Ақтұмсық деп ат қоямыз.
Кейіпкеріміз дамылдауға уақыт жоқ дейді. Таңда басталған тіршілік қас қарайғанша жалғасады. Күніне төрт мезгіл түйе сауып, оны аудан орталығына жөнелтеді. Қолы қалт етсе, жүн түтіп, ұршық иіреді. Еңбекпен есейіп, бейнеттен береке тапқан аяулы жан осылайша, отбасылық кәсіпті дөңгелетіп отыр.
АЙЖАМАЛ НАҚЫПОВА – САУЫНШЫ // Мен өзі қалаға қызықпаймын. Не бар қалада? Мына жақта маған физарядка. Қалада бәрі сатулы. Бәрі қолдан жасалған. Мен мына жақта өзімнің таза сауған шұбатымды ішемін.Өзімнің таза айранымды ішемін. Сары майымды жеймін. Мен ешқандайда өкінбеймін далада жүргеніме. Кішкене қалаға барсам, ауырып келемін.
Малшы отбасы қазір қыстауда. Апта айналса, жайлауға көш түземек. Айжамалдың айтуынша, бақыттың кілті бейнетте. Сондықтан қайрат қыл да, қам жаса дейді. Бүгінде отбасылық кәсіпті одан әрі өрістетуге балалары қолғабыс етуде.