#qyzylordatv #news #қызылорда #жаңалықтар #жезқазған#жолқұрылысы

Біздің телеарна ел үшін маңызды күре жол - Қызылорда-Жезқазған автобанының құрылысы басталған сәттен бері тасымал саласындағы ахуалды назарда ұстап келеді. Дәл қазіргі күнге мәлім болғандай, жолдың 70 пайызы дайын. Жыл соңына дейін қалған бөлігінің құрылысы да бітеді. Басты мақсат - автожол халықаралық талапқа сай болуы тиіс: ені де, қалыңдығы да, жалпы геометриясы да. Трассада жүріп жатқан жұмыстарды көріп қайтқан әріптесімнің бейнесюжеті.

 Кеше ғана бітпейтіндей көрінген иен даладағы енапат жұмыстың бүгінде біраз бөлігі еңсерілді. Ол ол ма, жыл соңына қарай толығымен тәмамдалмақ. Осылайша Қызылорда жағы Президент тапсырмасын орындап, көршілес Ұлытау аумағындағы тірліктің үдемелі қарқын алуын күтеді. Екі жақтағы жол құрылысы аяқталса, Сыр мен Есілдің арасын санаулы сағатта жалғауға болады. Яғни, жолаушы да әбіржімей, жүргізуші де ашуланбай, діттеген жеріне санаулы сағатта жетіп барад. Асфальт төселген тұстарға қар қоршаулары, жол белгілері, жарық бағаналары орнатылып, абаттандыру жұмысы жүріп жатыр.

Ал, құм-тас қоспасы жайылған аумақтарға осы сәуір айында асфальт түседі дейді мердігер мекемелер

ЧЖАО ДАХАО – «ССЕСС» КОМПАНИЯСЫНЫҢ ЖОБА ЖЕТЕКШІСІ /ҚЫТАЙ/Біз бұл жобаны 2022 жылы бастадық. Бұл біздің Қазақстан аумағында жол салу бағытындағы алғашқы жобамыз. Қазіргі таңда өзімізге тиесілі жұмыстың 80 пайызын тәмамдадық. Осы сәуірде асфальт саламыз. 300 жергілікті маман жұмылдырылған. Қытайдан техника әкелдік, қаржы тарттық дегендей. 15 шілдеге үлесіміздегі 52 шақырым жолды толық бітіреміз/

ЯНЬ ЦЗЕ – «Лунцзянь» ЖШАК ЖОБА ЖЕТЕКШІСІ /ҚЫТАЙ/ топырақ жабындысын тегістеп болдық, қазір құм-тас қабатын жауып болып қалдық, сәуірдің ортасынан бастап асфальт төсейміз. Санаулы айлардан соң, яғни жыл аяғына қарай жолды пайдалануға береміз/

Жол құрылысын жүргізіп жатқан компаниялардың жұмыс сапасын шетелдік инженерлер халықаралық стандартқа сай салынуын қадағалайды. Жылжымалы лабораторияларда жабынды сапасы жан-жақты тексеріледі. Мәселен, инженер Ли мырза Оңтүстік Кореядан келген маман

 ЛИ ВОН КВАН – РЕЗИДЕНТ-ИНЖЕНЕР /ОҢТҮСТІК КОРЕЯ/ Менің қадағалау құзырымдағы лоттардың жұмысы былтыр жыл аяғында бітуі тиіс еді, белгілі бір себептермен осы жылдың шілдесіне дейін ұзарды. Төселген геожабындының үстіне күні ертең асфальт қабаты төселеді. Мен бұл жерде 3-ші лоттағы тірлікке қатысты айтып тұрмын./

 Үлкен жолда бәрі қарастырылады – мал өткелі, жол асты құбырлары, көпірлер, демалыс алаңқайлары, жылы санитарлық тораптар. Жол құрылысы бітсе, тәулігіне 10 мыңға жуық көлік қатынайтын алып магистраль болғалы тұр.

Қалың асфальт қабаты автокөліктер үшін жайлы жүрісті қамтамасыз етпек. Одан бөлек, мердігерлер бұл жолдың сапасына 5 жылға кепілдік бермек, осы уақыт аралығында кем-кетік орын алып жатса, өз есебінен қалпына келтірулері тиіс, алайда Қызылорда аумағындағы жолдың сапасы жақсы дейді техқадағалаушы өкілдер. Осылайша биыл Қызылордада айтулы тірліктің ірісі – Қызылорда-Жезқазған жолының құрылысы бітіп, пайдалануға берілмек. Ал, қазір бұл аумақта үздіксіз қарқынды жұмыс жүріп жатыр. Кестеден қалмау керек.