«Өлеңім-өмірім». Осындай атаумен ұйымдастырылған әдеби кеште халықаралық жазушылар, Қазақстан журналистер одағының мүшесі, ақын Файзулла Сахиевтің 70 жылдық мерейтойы аталып өтті.
Бұл ақын Файзулланың қаламынан туған отты жырлары. Рухани кешке жиналған көпшілік алдымен аудан өнерпаздарының орындауында ақын шығармашылығына сапар шекті. Қазыналы Қаратаудан түлеген қабырғалы қаламгердің ақындықпен қатар, журналистика саласында өзіндік өрнегі бар. Кеште шалқар шабытпен оқырман қауымға тағылымды жырларын ұсынған ақынға облыстың Құрмет грамотасы табысталды.
Ғалым Әміреев – Жаңақорған ауданының әкімі
Файзулла Сахиев 1948 жылы Жаңақорған ауданының Ынтымақ ауылында дүниеге келген. Арынды ақын еңбек жолын бұрынғы «Коммунизм жолы», қазіргі аудандық «Жаңақорған тынысы» газетінде бастады. Шығармашылықтың ізінде жүре аудандық партия комитетінде, аудандық мәслихатта жауапты қызметтер атқарды. Мазмұнды шарада қажырлы қаламгердің ізбасарлары арнау өлеңдерін оқып, жылы лебіздерін білдірді.
Әбілхайыр Сыздықов – айтыскер ақын
«Жыр бесік», «Тоғыз перне», «Жыр жауһарлары» жинақтарымен бірге қаламгердің «Бабалар ізін жаңғыртқан», «Көңіл көзімен», «Келешегі кемел аудан», «Айтарым бар» секілді оннан астам кітаптары оқырманға жол тартқан. Енді солардың қатарына «Сыр толқыны» атты жаңа жинағы қосылды.
Файзулла Сахиев – ҚР жазушылар одағының мүшесі, ақын
Әдеби кеште көпшілік ақын өлеңдеріне жазылған әндерді тыңдап, тың серпінмен тарқасты.
Елжас Әбділда