#qyzylordatv
Әлеуметтік саладағы қаражатты тиімді пайдалану жөніндегі республикалық семинар-кеңеске қатысушылар үшін Сырдың бас шаһарының көрікті жерлеріне экскурсия ұйымдастырылды.
Әр өңірден келген делегация өкілдері қаланың жаңа әрі заманауи әлеуметтік нысандарын тамашалады. Алдымен қайта жаңғыртудан өткен Тәуелсіздік даңғылы арқылы өтіп, «Отбасы орталығы», «Жаңа Достық үйі», «Қызылорда Арена» спорт кешенінің құрылыс барысымен, «Өнер орталығы» ғимаратының сыртқы келбетімен танысты. Олар аялдаған алғашқы нысан - «Сыр жұлдыздары» шығармашылық академиясы. Мұнда түрлі бағыт бойынша 39 үйірме жұмыс істеп тұр. Әр үйірме мектеп оқушыларының жас ерекшелігіне сай ұйымдастырылған. Мүгедектігі бар балалар үшін лифт пен пандус қарастырылған. Академияның басты мақсаты - баланың қабілетін ашып, болашақ мамандығын таңдауға көмектесу.
Мұнан соң меймандар «Анаға тағзым» орталығына барды. Көпшіліктің назарын ғимараттың сәулеті мен монументі аударды. Одан соң барлығы естелікке суретке түсті.
МАДИНА МЫРЗАБЕКОВА - ШЫҒЫС ҚАЗАҚСТАН ОБЛЫСЫ ДЕНСАУЛЫҚ САҚТАУ БАСҚАРМАСЫ БАСШЫСЫНЫҢ ОРЫНБАСАРЫ Бір топ мейман қалалық мәдениет және демалыс паркінде серуендеді. Жайлы аллеялар, көркейту мен көгалдандыру жұмыстары көңілдерінен шықты.
Өңірлерден келген қонақтар Сыр еліндегі даму қарқынын жоғары бағалап, жүзеге асырылып жатқан жобалардың аймақ тұрғындарына игілігін тигізетініне сенім білдірді.