#qyzylordatv
Еліміздің негізгі заңы – Конституциямызға биыл 30 жыл толып отыр. Осы мерейлі датада Дала заңынан бастау алған ел құжатындағы басымдықтар қалай жүзеге асуда? Ел Президенті айтқан заң үстемдігі қалай салтанат құруда? Сыр төрінде өткен салтанатты іс шарада теңдік, кепілдік сынды құндылықтарды бекіткен басты құжаттың принциптері аталды, заң мен тәртіптің сақталуына үлес қосып жүрген азаматтар марапатталды. Жиын және мерейлі күн туралы журналист шолуы.
Қарапайым тілмен айтсақ, әрбір қазақстандық үшін Конституция бұл тек заңдардың темірқазығы ғана емес, бұл мемлекеттікті, бостандықты, теңдікті біріктірген жарғы. Ата заң әр адамның құқы мен еркіндігін бекітіп, әділдіктің тірегі болар тұғырлы құжат. Қазақстанның Конституциясы көп этносты мемлекеттің бет-бейнесін басшылыққа алуымен де бөлек. Құжатта жүзі бөлек болса да, Отаны бір ұлыстардың бірлікте ұйып отырғаны ел саясатының маңызды ұстанымы екені де аталған. Одан бөлек, Ата заң еліміздің халықаралық істердегі позициясын айқындайтын құжат. Конституция күнін мерекелеу бұл бір жағынан даму бағытымызды бір саралап өту, ортайған тұсымызды толтыру, рух пен қуатымызды нығайту. Өңір төріндегі Өнер орталығында өткен салтанатты жиынның басты мұраты да осы болды.
Бұл күн елдегі ахуал, ертеңнің бет-бейнесі өзімізге тікелей байланысты екенін тағы бір айғақтайтын күн. Бүгін не жасалды, алдағы жоспар мен бағытымыз туралы облыс әкімі өз хабарламасында тоқталды.
Алдағы жоспар демекші, 2025-2028 жылдары аймақта құны 2 трлн теңгеге жуық 89 инвестициялық жоба жүзеге асырылып, 11 мыңнан астам жаңа жұмыс орны ашылады. Биыл 302 млрд. 500 млн теңгеге 27 жоба іске қосылады екен. Құжаттағы құқықтарымыз туралы тағы бір айта өтсек. Мәселен, Конституциямыздың 29-бабында әр адамның білім алуға құқы барын көрсеткен. Ол үшін мемлекет барлық жағдайды жасауға міндетті. Аталған баптың біздің облыста айтулы дәрежеде орындалып жатқанының куәсіміз.
Ата Заңдағы басымдықтардың орындалуына, елде заң мен тәртіптің үстемдік құруына елеулі үлес қосып жүрген азаматтардың бір шоғыры облыстың Құрмет грамотасымен, облыс әкімінің Алғыс хатымен марапатталды
Осы салтанатты жиында облыстың әлеуметтік-экономикалық ахуалы туралы талай еңбек жазған, әлі де тың ізденістерімен танымал белгілі азамат, бүгінде еңбек ардагері Кеңесбек Махамбетовке «Қызылорда облысының құрметті азаматы» атағы берілді.
Ықылымнан дана қазақ адамдық шеңберінен аспасын деп Жеті жарғыны бекітті. Дала заңы қазақтың қағидаты болды. Заң сақталса, ел сақталатыны, заң күшейсе, мемлекет күшейетіні аксиомаға айналғаны қашан.
Конституция күнін атап өту қазақстандықтар үшін басты саяси-құқықтық оқиға ғана емес, бұл - азаматтық рух пен патриотизмді нығайтуға бағытталған айрықша күн.