#qyzylordatv
Бүгін – Ядролық сынақтарға қарсы халықаралық іс-қимыл күні. Бұл атаулы күнді Біріккен Ұлттар Ұйымының бас Ассамблеясы өз аумағындағы сынақ полигонын тарихта алғаш болып жапқан Қазақстанның бастамасы бойынша бекіткен. Бүгін Қызылорда қаласындағы «Тағзым» алаңында ядролық сынақ құрбандарын еске алу шарасы өтті.
Семей ядролық полигоны ел тарихындағы ақтаңдақтардың бірі.Сол зұлмат шақта 450-дей ядролық жарылыстың 120-дан астамы ашық аспан астында жарылды. Зардабы Хиросимаға тасталған бомбадан 2,5 мың есеге асып түсті. Қазақ даласының 300 мың шаршы шақырымы радиациямен уланып, одан 1,5 миллионнан астам адам зардап шекті. Ал, осы зұлматтың ордасы Семей сынақ алаңын жабу – ядролық қарусыз әлем құру жолындағы қазақ халқының ұлы қадамдарының бастауы болды.
Тағылымды іс-шарада ядролық сынақтан қаза тапқан жандарды бір минут үнсіздікпен еске алу рәсімі ұйымдастырылып, ескерткішке гүл шоқтары қойылды. Ал, қасиетті қазақ жерін тажал қаруды сынайтын тозаққа айналдырған кезең артта қалды. Алайда атом улаған далада сынақ жұмыстарына қатысқан ардагерлердің бірі Қарақұл Дармолдаев үшін бұл күн ұлттың ұмытылмас қасіреті, ең ауыр зардаптардың естелігі деуге болады.
Еске алу рәсімінде ядролық қарудың зардабынан қаза болған ардагерлердің рухына құран бағышталды. Іс-шараға қатысушылар ядролық сынақтардың адамзатқа тигізген ауыр зардабы жайында сөз қозғап, бейбіт өмірді бағалауға шақырды.
Семей полигонындағы алғашқы сынақ 1949 жылы 29 тамыз күні жасалды. 1991 жылы дәл осы күні полигон жабылды. Осылайша Ядролық сынақты тоқтату арқылы Қазақстан өз имиджін қалыптастырды.