#qyzylordatv
Конституция күніне орай облыстық полиция департаментінде салтанатты іс-шара ұйымдастырылды. Мерекелік жиында қызмет бабында ерекшеленген сақшылар марапатталып, ардагерлерге құрмет көрсетілді.
Көк байрақты көкке көтерген сарбаздар саптық дайындықта мемлекеттік туды тұғырына қойды. Ал асқақ рухмен шырқалған Әнұран әрбір азаматтың жүрегіне мақтаныш ұялатып, отанға деген сенімін нығайта түсті. Конституция күнін Сыр сақшылары да жоғары салтанатпен атап өтті. Ата заң – өткеннің өнегесін, бүгіннің бағыт-бағдарын, болашақтың биігін айқындайтын темірқазық. Ата заң - мемлекет пен азаматтың арасындағы рухани келісім, заң мен ар арасындағы жарасымды үндестік. Құнды құжаттың биыл қолданысқа енгеніне 30 жыл. Бұл тек уақыт өлшемі ғана емес, заң үстемдігі мен әділеттің, теңдік пен еркіндіктің салтанат құру кезеңі.
Салтанатты жиында облыстық полиция департаментінің бастығы Серік Жүрсінбайұлы осы уақыт ішінде «Конституция - ел дамуының алтын арқауына айналды», - деді.
Мерекелік іс-шарада Полиция департаментінің бастығы қоғамдық тәртіпті сақтауға ерекше үлес қосқан, қызметтік міндеттерін адал атқарған полицейлер мен ардагерлерге марапат табыстады.
Мерейлі мерекеде қызмет бабында ерлікпен қаза тапқан полиция лейтенанты Талғат Қозыбаевты тәрбиелеген Есентай Қозыбаевқа және ішкі істер органдарында қажырлы еңбек еткен сала ардагері Асылхан Абдрамановқа құрмет көрсетіліп, шипажайға жолдама берілді.
Мұнан соң Ардагерлер кеңесінің төрағасы Әмірбек Шаймағамбетов қызметкерлерді құттықтап, азаматтық борыштарын абыроймен атқаруларына тілектестігін білдірді. Сондай-ақ мерейлі мезетте ішкі істер органдарының құрметті ардагері, Қазақстан Журналистер Одағының мүшесі Хұсайын Асанұлының «Офицер жазбалары» атты кітабының тұсаукесер рәсімі өтті. Автор жаңа жинақта құқық қорғау саласындағы қызмет кезіндегі орын алған атышулы қылмыстар мен тергелген қылмыстық істер, жаңадан қабылданған заңдар, тарихи зерттеулер мен портреттік очерктерді топтастырған.
Мерекелік іс-шара әрі қарай концерттік бағдарламаға ұласты. Халықтың тыныштығы мен қауіпсіздігін қорғап, қоғамдық тәртіпті қамтамасыз етуде абыройлы қызмет етіп жүрген полиция қызметкерлеріне арнап жергілікті өнерпаздар әннен шашу шашты.