#qyzylordatv
«Мұз айдыны» спорт кешенінде мүгедектігі бар азаматтар арасында облыстық спартакиада басталды. Дәстүрлі додада қала мен 7 ауданнан келген 8 команда өзара шеберлік байқасуда.
Соңғы жылдары аймақта параспортшыларға айрықша көңіл бөлініп келеді. Қаламызда арнайы клуб құрылып, спортпен шұғылдануға толықтай жағдай жасалған. Қазіргі таңда спортты жанына серік еткен сырбойылық мүгедектігі бар жандар республикалық сайыстарда топжарып, жүлдегер атанып жүр. Ал, облыстық спартакиада алдағы болатын ел біріншіліктеріне іріктеу ретінде өткізіліп отыр.
Дәстүрге айналған облыстық спартакиадаға 100-ден аса адам қатысып жатыр. Олар үстел теннисі, дойбы және қол күресінен сайысқа түсуде. Мұндай спорттық шаралар параспортшылардың белсенділігін арттырып, өзара достық қарым-қатынас орнатуға ауадай қажет.
Дәстүрлі спартакиада 30-тамызға дейін жалғасады. Жеңімпаздар мен жүлдегерлердің есімі сол кезде анықталып, диплом, медальдармен марапатталмақ.