Жалағашта бұқаралық спортты дамытуға ерекше ден қойылуда. Бүгінде аудан орталығында жаңадан спорт кешені бой көтеріп, ел игілігіне берілген. Осының нәтижесінде балалар салауатты өмір салтын ұстанып, спортпен шұғылдануға мүмкіндік алуда.
Дені сау ұрпақ тәрбиелеу үшін жастарды спортқа баулу маңызды. Бұл ретте Жалағаш кентінде жыл басында дене шынықтыру-сауықтыру кешені ел игілігіне берілді. Мұнда таэквондо футбол, волейбол, баскетбол секілді спорт үйірмелері ашылған. Елді мекендегі 900-ге жуық жасөспірім күнделікті спортпен шұғылданып, шеберліктерін шыңдауда. Ал, жалағаштық жеткіншектерге халықаралық дүбірлі додаларда жетістікке жеткен білікті мамандар тәлім беруде.
Ғимарат толықтай спорттық құрал-жабдықтармен қамтылған. Кешенде заман талабына сай әмбебап ойын залы бар. Мұнда жас спортшылар волейбол ойнайды. Жасөспірімдердің спорттың осы түріне деген ынтасы жоғары екені байқалады. Залда тоспадоптың қыр-сырын меңгеруге ұмтылған жас спортшылар жетерлік. Ауыл жастарының арманы әлемге танымал ойыншы атану.
Мұнан бөлек ауданға қарасты Аққыр елді-мекенінде жабық спорт алаңы салынып жатыр. Қазіргі таңда нысанның құрылысы аяқталуға жақын. Жуық арада іске қосу көзделуде. Бұл бұқаралық спортқа бет бұрған жастардың санын одан әрі көбейте түспек.