Масақ теріп, трактор жөндедік. 90 жастағы тыл ардагері Оспан Жанұзақ соғыс жылдарындағы бастан өткен бейнетін әңгімелеп берді. Қара жұмысқа ерте араласқан ақсақал қазір Жалағашта тұрады. Бүгінде бүтін бір әулеттің бәйтерегіне айналған. Тылда тынымсыз шаруа бітірген қариямен тілшіміз Мақсат Кәрібай тілдесіп қайтты.
Тыл ардагері Оспан ақсақал сұрапыл майдан жылдарын күрсіне еске алады. Екінші дүниежүзілік соғыс Оспан Тәуекелұлының тұтас балалық шағын біржола ұрлаған. Бұрынғы Коммунизм колхозында туып өскен қария балалық шағымыз қара жұмысқа жегілумен өтті дейді. Сол кездегі қаршадай ғана бала егістікке шығып, масақ теріп еңбек еткен.
«Егіс алқабында егін орып, жиған-тергенінімізді майдан даласына жүрген жауынгерлерге жіберіп отырдық» дейді тыл ардагері. Ол кезеңдерде ағыл-тегіл ас та жоқ, бәрі санаулы болатын еді деп еске алды. Соғыстан соң Оспан ақсақал қазіргі Қаракеткен ауылына көшіп келген. Ауыл шаруашылығы техникумын тәмәмдап, әскер қатарында болады. Отан алдындағы борышын өтеп келген соң ауыл шаруашылық саласында тер төкті.
Ал, қазір бір әулеттің ақылшысына айналған еңбек майдангері немере-шөбере сүйіп, бейнетінің зейнетін көріп отыр. Қазыналы қарт келер ұрпақ соғыс зобалаңын көрмесін деп ақ батасын берді.
Айта кетейік, бүгінде аймақта 2 соғыс ардагері мен 1717 тыл ардагері бар.