Облыс орталығында жырау, ақын, ағартушы, Жазушылар және Журналистер Одағының мүшесі Ибрагим Бекмахановты еске алу кеші өтті.
Ибрагим Бекмаханов 1951 жылы Қармақшы ауданы, Ақтөбе ауылында туған. Еңбек жолын аудандық «Коммунизм шамшырағы» газетінде корректор болып бастаған ол әр жылдары радиохабар ұйымдастырушысы, аға тілші, Қармақшы аудандық атқару комитетінде ұйымдастыру бөлімінің меңгерушісі болып жұмыс істеген. Оның 1993 жылы «Шапағат» атты тұңғыш өлеңдер жинағы шыққан. Ибрагим Бекмаханұлы тіл мен әдебиет жанашыры ретінде өнегеге толы ғұмыр кешкен бірегей болмыс иесі. Көзін көргендер оның жұмысқа жауапкершілігі зор, бірбеткей мінезімен дараланғанын айтады.
ЖАҒЫППАР ҚАРАБАЛА - ҚАЗАҚСТАН ЖУРНАЛИСТЕР ОДАҒЫНЫҢ МҮШЕСІ, ҚР АҚПАРАТ САЛАСЫНЫҢ ҮЗДІГІ
// «Ол мықты журналист. БАҚ арқылы азаматтық позициясын білдірген. Елдің елдігін, жердің мықтылығын, тәуелсіздігіміздіің тұғырлы болуына атсалысқан азамат. Жосалыдан еңбек жолын бастап, Қызылордада, Жезқазғанда оның алдында Торғайда, Қарағанды облысында өмірінің соңына қараай Алматы қаласында шығармашылықпен айналысты. Ең бастысы ағамыз үлкен жүректің иесі. Қаншама бағыт, қаншама жанрды бағындыру жәй адамның қолынан келе бермейтін іс». //
Ибрагим Бекмаханұлы – атақты жырау, Сыр сүлейі Тұрымбет Салқынбаевтың туған немересі. Ол атасының әдеби мұраларын жинақтап, «Талайды таңырқатқан жырау едім», «Атандым жас күнімнен бала жырау», «Жүйрігі едім халықтың» атты жинақтарын жарыққа шығарған.
АЛМАТ ТОҚШЫЛЫҚОВ - И.БЕКМАХАНОВТЫҢ ДОСЫ // «Ибрагим 30-ға тарта кітаптар шығарды. Оның ішінде поэмалары бар, өлеңдері, прозалық шығармалары бар. оны халық сүйсініп оқитын дәрежеге жетті. Оның өмір жолындағы ең мағыналы шағы Жезқазғанда өтті. Сол ауылдың тұрмыс-тіршілігін айтып, өсіп-өркендуіне, дамуынав өз үлесін қосты»//
Бүгінде дарынды қалам иесінің үш бірдей пьесасы театрда сахналанып, жиырмаға жуық музыкалық шығармалары шырқалып жүр. Сондықтан ақынның жүрегінен шыққан асыл жырлары халық еншісінде өшпес қазына болып қала бермек. Салтанатты шарада Ибрагим Бекмаханұлының «Сырдария-Ұлытау» кітабының тұсауы кесіліп, кітапхана қызметкерлері ақын шығармаларынан үзінді оқыды.