Өңірде мал ұрлығына қарсы күрес күшейді. Полицейлер жүргізген «Мал ұрысы» жедел профилактикалық іс-шарасы нәтижесінде жеті қылмыстың беті ашылды. Заңсыз тасымал мен мал жаю ережелерін бұзғандарға да шара қолданылды.
Наурыздың 11-31 аралығында полиция қызметкерлері жергілікті атқарушы органдармен бірге мал тасымалдау және сату орындарын тексерді. Нәтижесінде бұрын орын алған алты мал ұрлығы мен өткен жылдардағы бір қылмыс ашылды. Сонымен қатар, малды заңсыз тасымалдаудың 39, белгіленбеген жерде жаюдың 117 дерегі анықталып, әкімшілік хаттамалар толтырылды. Мысалы, 16 ақпанда Қармақшы ауданында жайылымда жүрген жылқыны белгісіз біреулер сойып кеткен. Жедел іздестіру шаралары барысында төрт күдікті ұсталды. Қазір тергеу амалдары жүргізілуде.