Облыс орталығындағы жыраулар үйінде дәстүрлі ізбен кезекті өнер кеші ұйымдастырылды. Бұл жолы талантты жыршы Марат Сүгірбай «Ақтан батыр» жырын жырлап, қазақтың бай мұрасын жаңғыртты.
«Ақтан батыр» жырының бірнеше нұсқасы бар. Бұл жолы дәстүрлі өнер дарабозы белгілі қаламгер Файзулла Омаровтың тарихи туындысын орындады. Шығармада халық батыры Ақтан Ақайұлының ерлік ісі жан-жақты суреттеледі. Мәселен, Хиуа, Қоқан бекіністеріне жасаған жорықтары кезінде күрмеулі сәттегі ұтымды шешімі бүгінгі буынға батырлық рухын сезіндірері анық. Тағылым таразыланған кеште жырсүйер қауым тарихи дастанды бір сағат бойы тапжылмай тыңдады. Жалпы, жыраулар үйінде осылай өнер көшін өрістету жолында қыруар шаруа атқарылып келеді. Алда тағы ұмыт бола бастаған бірнеше тарихи дастанды жаңғырту жоспарда бар.
АМАНДЫҚ БҮРЛІБАЕВ – ОБЛЫСТЫҚ ФИЛАРМОНИЯ ДИРЕКТОРЫНЫҢ ОРЫНБАСАРЫ /Жыраулар үйі ашылғалы бері Сыр бойындағы ақын-жыраулардың шығармаларын насихаттау мақсатында 40-қа жуық іс-шара атқарылды. Демек, бұл орталық тек Сыр бойында ғана емес, Қазақстан көлеміндегі осы дәстүрлі орындаушыларымыздың басы тоғысатын киелі шаңырақ болады деген сенімдеміз.../
МАРАТ СҮГІРБАЙ – МӘДЕНИЕТ САЛАСЫНЫҢ ҮЗДІГІ /Осынша аз уақыттың ішінде аудан-аудандағы өнерпаздар келіп, осы кезге дейін жинаған бүкіл жыр қорын, қымбат қазыналарды халыққа келіп қауыштырып жатыр. Ал енді сол ізбен мен бір жылдың ішінде үшінші рет концертімізді беріп жатырмыз. Дастан жырлау мәдениетін жаңғыртып отыруымыз қазіргі кезде кезек күттірмейтін өзекті мәселенің бірі/