#qyzylordatv
Үкімет басшысының орынбасары сондай-ақ, Жалағаш ауданына қарасты «Таң ЛТД» шаруа қожалығының егіс алқабына барып, диқан қауымның пікіріне құлақ түрді.
Қалыптасқан ахуалға байланысты аталмыш ауданда да су мәселесі өзекті. Әсіресе, Бұқарбай батыр, Мәдениет, Мырзабай ахун ауылдық округтерінде тіршілік нәрінің тапшылығы қатты сезіліп отыр. Қолда бар ақпарға сүйенсек, су тапшылығына байланысты ауданда 306 гектар күріш жетілмей қалған. Ал, қазір 461 гектар алқапта қашыртқы суы қайта пайдаланылып жатыр. Ол үшін шаруалар су сағаларына 44 дана насос қондырғысын орнатып, егісті сақтап қалудың қамында жүр. Жалпы, жалағаштық еңбеккерлер биыл 36 мың 742 гектарға ауылшаруашылығы дақылдарын еккен. Соның ішінде күріш көлемі 19 мың 357 гектар.
Айта кетейік, аймақта суды тиімді пайдалану мақсатында 320-дан астам сорғы қондырғысы іске қосылған. Егістіктің 98 пайызы 5 магистральдық және 3 шаруашылықаралық канал арқылы кестеге сәйкес суарылуда. Жағдай Үкіметтің тұрақты бақылауында.