Облыстық кітапханада «Секреты успеха JURTTYN BALASY» атты мотивациялық кітаптың таныстырылымы болды. Кешке кітаптың негізгі кейіпкерлері болған AlmaU түлектері: Тимур Құдайбергенов, Нұргүл Құрманова, Ақмарал Тоқмұрзиевалар қатысып, өз ойларымен бөлісті. Кітапта жетістікке жету жолдары, университет түлектерінің оқиғасы баяндалады.
Кітаптың атауы «Әне, жұрттың баласын қарашы» деген ата-ананың баласына өзгені үлгі етіп көрсетуінен алынған. Шара барысында кітап кейіпкерлірінің бірі – Тимур Құдайбергенов такси жүргізушісінен қалай миллионерге айналғаны жөнінде оқиғасымен бөлісті. Бүгінде Тимур Құдайбергенов бірнеше компанияның иесі. Кеш барысында ең жақсы сұрақ қойған оқырманға сыйға кітап табысталды.
ТИМУР ҚҰДАЙБЕРГЕНОВ – КӘСІПКЕР
Кітапта өзім басымнан кешкен оқиғаны баяндадым. Кәсіпкерлерге, әсіресе жастарға, кәсіпкерлікке енді қадам басып келе жатқан кісілерге өзмінің жетістігімді, жеңіске қалай жеткенімді жаздым. Әлеуметтік желілерде мұндай оқиғалар ерекше әсер сыйлайды. Мен Қызылорда кәсіпкерлерінің оқып, білімін жетілдіріп отыратынына өте қуаныштымын.
АҚМАРАЛ ТОҚМҰРЗИЕВА – ЖОҒАРЫ БИЗНЕС МЕКТЕБІ АЛМАТЫ МЕНЕДЖМЕНТ УНИВЕРСИТЕТІНІҢ ҚЫЗЫЛОРДА ҚАЛАСЫНДАҒЫ ӨКІЛДІГІНІҢ ДИРЕКТОРЫ
Бұл бизнес туралы кітаптың бірінші томы, әзірге орыс тілінде жарық көрді. Екінші томын қазақ тілінде жазып жатырмыз. Ол жерден онға жуық қызылордалық кәсіпкерлердің жетістігі баяндалады. Біз кітаптарымызды кітапханаға сыйлап отырмыз. Бұл оқырмандарға үлкен сыйлық болады деп ойлаймыз.