#qyzylordatv
Конституция күніне орай ардагерлер үйінде салтанатты жиын өтті. Іс-шарада аймақтың өсіп-көркендеуіне үлес қосып, түрлі салада еселі еңбегімен танылған ардагерлер «Қызылорда облысының құрметті ардагері» медалімен марапатталды.
Қарттарды қадірлеп, лайықты құрмет көрсету облыстық ардагерлер кеңесінің басты ұстанымдарының бірі. Бұл жолы да елге еңбегімен танылған қарапайым азаматтарға құрмет көрсетіп, көптің алдында алғысын білдіруді жөн деп санаған. Конституция күніне орайластырылған жиында сөз алған аға буын «Ата заңды қадірлеу – тек заңды мойындау емес, елге деген сүйіспеншілікті, азаматтық жауапкершілікті жүрекпен сезіну» екенін ұғындырды.
Мұнан соң облыстық ардагерлер кеңесі алқа мәжілісінің қаулысымен үш ардагерге «Қызылорда облысының құрметті ардагері» медалі табысталды. Солардың бірі - сексеннің сеңгіріне шыққан Жұмабай Қасымов. 40 жылға жуық уақыт ұстаздық еткен Жұмабай Байжанұлы қарапайым мұғалімдіктен бастап, мектеп директоры болды. Партия жұмысына белсене араласты. Іңкәрдария ауылдық советіне бірнеше мәрте депутат болып, елдік істердің оң шешілуіне үлес қосқан.
Мұндай марапатқа ие болғандар қатарында Мүсірәлі Шөкенов пен Әбдімәулен Тоқтыбаев та бар. Мүсірәлі Шөкенов ұзақ жылдар коммуналдық қызмет саласында еселі еңбек етсе, Әбдімәулен Тоқтыбаев еңбек жолын зоотехник болып бастап, Шиелі ауданы әкімінің орынбасары қызметін абыроймен атқарды. Жиында сөз алған ардагерлер әрбір азаматтың абыройлы еңбек жолы өскелең ұрпаққа өнеге екенін жеткізді.
Ардагерлерге құрмет жергілікті өнерпаздардың мерекелік бағдарламасына ұласты.