#qyzylordatv
Дәстүрлі қолөнер мен заманауи креативті индустрияны ұштастыра отырып, ұлттық ою-өрнектің мәнін, тарихын, қолдану аясын кеңінен насихаттау мақсатында «Анаға тағзым» орталығында «ОЮLIKE» іс-шарасы өтті. Кәсіби-шеберлік алаңында «Түкті кілемше тоқу», «Құрақ құрау технологиясы», «Этностильдегі киізден жасалған бұйымдарды жасауда creative өнерді дамыту» және «Заманауи шоппер тігу» тақырыптары бойынша тегін шеберлік сағаттары болды.
Дала тылсымын танып, табиғатпен етене үндескен бабаларымыз жазу-сызуды танымай тұрып-ақ, ою-өрнекті хат, қарым-қатынас құралы ретінде пайдаланған. Мәселен, қазақ халқының дәстүрлі бұйымдарында: қару өнерінде, киіз үй, зергерлік бұйым, ыдыс-аяқ, сонымен қатар өру, тігу әдісімен дайындалатын киімдерді ою-өрнектермен әшекейлеуде ою-өрнек кеңінен қолданылған. Солардың ішіндегі ең көп тарағаны «мүйіз» тектес ою-өрнек. Мысалы, «қошқар мүйіз», «арқар мүйіз», «бұғы мүйіз», «қырық мүйіз», «сыңар мүйіз», «төрт құлақ», «құс қанаты» деп айтылып жатады. Жергілікті қолөнер шеберлері де осы элементтердің сан түрлі композициясын жасап, бұйымдарға ұтымды пайдаланып келеді. Солардың бірі қызылордалық ісмер Қарлығаш Ілиясова. Бүгінде ол таза былғарыдан жасалған қол сөмке, қазақтың түс киізі, этно стильдегі шапандарымен танымал. Кәсіпкер өзінің авторлық туындыларын Оюлайк алаңында көрермен назарына ұсынды.
Ұлттық қолөнерді ұлықтаған шараға қатысушылардың және бірі – кәсіпкер Айман Әбдиева. Ол кішкентай қыздарға арнап тігіліген көйлектерімен тәнті етті.
Кәсіби-шеберлік алаңының негізгі бөлімінде этнограф ғалымдар мен дизайнерлер, креативті кәсіпкерлер, тарихшылар бас қосып, қазақ ою-өрнегінің тарихи негіздері және сән индустриясы мен қолөнерде дәстүрлі өрнектердің заманауи қолданысы турасында ой-пікірлерін ортаға салды.
Басқосуға Қазақстан Республикасы Президенті жанындағы Әйелдер істері және отбасылық-демографиялық саясат жөніндегі Ұлттық комиссия мүшесі Гаухар Тасбергенова мен белгілі этнограф, график-суретші Ералы Оспанұлы арнайы қатысты. Ералы Оспанұлы салт-дәстүріміз бен әдет-ғұрыптарымыздың ұмыт бола бастаған тұстары мен ою-өрнектердің тарихы турасында тың деректерімен бөлісіп, жеке зерттеулері нәтижесіне тоқталды.
Шыны керек, қазіргі таңда ұлттық киім кию үрдісі кеңінен етек жайғанымен оюдың мәніне, қолданатын орнына аса мән бермей жатамыз. Ұлттық киімді заман талабына сай тігуге ұмтылған дизайнерлер де кейде оюды орынсыз қолданып жүр дейді шараға қатысушылар. Сондықтан осы жәйттерге көңіл аударатын кез жетті. Ал, дәстүрлі өрнектерді жаңғырту бағытындағы шараға бірқатар өңірден креативті индустрия бойынша өкілдер ZOOM платформасы арқылы қатысып, тәжірибе алмасты.