Сүйінші ақпар! Қызылордалық боксшы Аслан Елдібайұлы Черногория мемлекетінде өткен Әлем чемпионатында қола медаль жеңіп алды. Байрақты бәсекеде ел абыройын асқақтатқан жерлесімізді жақындары мен жанкүйерлері әуежайдан сән-салтанатпен күтіп алды.
Черногорияның Будва қаласында жалауы желбіреген әлем біріншілігіне 73 мемлекеттен 600-ге жуық спортшы қатысты. Дүбірлі додада аса ауыр салмақ дәрежесінде өнер көрсеткен жерлесіміз шаршы алаңда 3 ойын өткізді. Алғашында қытайлық Жанг Даны екінші раундта нокаутқа жіберсе, келесі кезеңде өзбекстандық Джафарбек Шахбазовты айқын басымдықпен жеңді. Аслан Елдібайұлы шешуші сәтте өзбек боксшысынан 4:1 есебімен жеңіліс тапты. Осылайша, Сыр спортшысы бокстан жастар арасындағы Әлем чемпионатының қола жүлдесіне ие болды. Айта кетейік, бұған дейін Аслан Елдібайұлы жасөспірімдер арасындағы Азия чемпионатында күміс жүлдегері атанған болатын.