Қала әкімі Нұржан Ахатов шаһарда құрылысы жүріп жатқан бірқатар нысанды аралап, жұмыс барысымен танысты.
Естеріңізге салайық, бұған дейін аймақ басшысы Нұрлыбек Нәлібаев әлеуметтік нысандар құрылысы мен тапсырылу мерзіміне баса мән беруді шегелеп тұрып тапсырған болатын. Сондықтан қала әкімі құрылыс нысандарына жеке-жеке аялдап, жұмыс барысын мұқият қарап шықты. Алдымен орталық стадионның құрылысын көрді. Бұл нысанның іргетасы мамыр айында қаланған. 11 мың орынға лайықталған аренаның қазіргі таңда трибуналары салынып жатыр.
Мұнан соң шаһар басшысы сол жағалауда бой көтеріп жатқан көпқабатты 10 тұрғын үйдің құрылысын көрді. Мұндағы жұмыстар жоспарға сәйкес атқарылуда дейді жауаптылар.
Нұржан Ахатов тарихи-мәдени мұра орталығы, музыкалық колледждің жаңа ғимараты мен «Инновациялық-шығармашылық орталығының» құрылыс барысын көрді. Бұл нысандар да келесі жылы қолданысқа берілуі тиіс.
Сондай-ақ шаһар басшысы сол жағалаудағы жанында жатақханасы бар физика-математика бағытындағы мектеп-интернаттың құрылысымен танысты.
ЕРЛАН ТӨРӘЛИЕВ – ОБЛЫСТЫҚ ҚҰРЫЛЫС, СӘУЛЕТ ЖӘНЕ ҚАЛА ҚҰРЫЛЫСЫ БАСҚАРМАСЫНЫҢ БАСШЫСЫ
«физика-математика мектебі 400 орындық. Ол обьектінің де құрылыс жұмыстары өте қарқынды жүріп жатыр. жылуға қосылған, су, материал бәрі басында. Оны мамыр айында тапсырамыз. Оның құны 8.4 млрд теңге. Оның ішінде 300 орындық жатақханасы бар. оған тек қаланың, ауданның оқушылары емес сырттан да келу мүмкін басқа облыстардан. Бұл республиканский масштабтағы жоба».
Әр істе сапа маңызды. Сондықтан құрылыс жұмыстары алдағы уақытта да қатаң бақылауда болмақ.