#qyzylordatv #news #жаңалықтар #қызылорда
Қалалық орталықтандырылған кітапханалар жүйесіне тиесілі 6 ғимарат күрделі жөндеуді қажет етеді. Қазір кітап қорын сақтау қауіпті жағдайда тұр. Сондай-ақ іргетасы жүз жыл бұрын қаланған жастар театрының ғимараты да тозған. Бүгін қалалық мәслихат депутаттары мәдениет саласына қатысты бірқатар нысандарды аралап көрді.
Қалалық жастар театрының құрылғанына көп уақыт бола қоймаса да, көрерменнің көзайымына айналып үлгерді. Бірақ бүгінде олардың өнерін кең көлемде насихаттау үшін ғимарат мәселесі қиындық тудырып отыр. Сахна мен көрермендер залының жабдығы жаңалауды қажет етсе, ғимараттың электр желісі түгелдей тозған. Жылу жүйесі де мардымсыз. Қойылымдарды сапалы дыбыспен қамтамасыз ету үшін заманауи дыбыскүшейткіш қондырғылар қажет. Жастар театрының аумағында орналасқан парк және спорт алаңдарын күтіп-ұстау жұмыстары да өзекті. Мәселемен танысқан депутаттар сала басшысына қажетті жобалау құжаттарын дайындауды тапсырды.
Тасбөгет кентіндегі балалар кітапханасын кент орталығына көшіру мен өзге 6 нысанды күрделі жөндеу күн тәртібінде. Бүгінде сарқылмас қазына саналған кітаптар кітапханашылардың күшімен сақталуда. Талапқа сай орын жоқ. Тіпті үш кітапхана жалға алынған ғимаратта орналасқан. Сонымен бірге компьютер жетіспеушілігі кітапханалар жүйесінің заман талабына сай жұмыс істеуіне кедергі келтіруде.
Былтыр қараша айынан бастап қалалық демалыс паркіне қайта жаңғырту жұмыстары жүріп жатыр. Алдағы уақытта парк аумағына жаңа үлгідегі аттракциондар, балалар және спорт алаңдары, субұрқақтар салынады. Бұл жұмыстарды «BI Global» ЖШС атқаруда.
Мұнан соң депутаттар мәселелерді комиссия отырысында талқылады. Қалалық мәдениет және тілдерді дамыту бөлімінің басшысы ЖағыпарТәжмаханов саладағы өзекті мәселелерді баяндады.
Қалалық қоғамдық даму бөлімінің басшысы Айдын Қайруллаев хабарлама жасап, бірқатар сауалдарға жауап берді. Биыл Қызылорда қаласының астана болғанына 100 жыл толады. Осы орайда іс-шараларды жоғары деңгейде ұйымдастыру жайы талқыланды. Депутаттар өзекті мәселелерді қаржыландыруды әр кезеңге бөлу туралы ұсыныс білдірді.