Денсаулық вице-министрі тұрғындармен кездесті
Сыр өңiрiне жұмыс сапарымен келген Денсаулық сақтау вице-министрi Тимур Мұратов «Достық» үйінде халықпен кездесті. Жүздесуде салада атқарылып жатқан жұмыстар мен оң өзгерiстердi баяндап, тұрғындардың сұрақтарына жауап бердi.
Вице-министр алдымен саладағы оң өзгерістерге тоқталды. 2025 жылы күтілетін өмір сүру ұзақтығы 75,97 жасқа жетті. Бұл – еліміздің тәуелсіздік жылдарындағы ең жоғары көрсеткіші. Қызылорда облысында бұл көрсеткіш 74,88 жасты құрап отыр. Негізінен медициналық-санитариялық алғашқы көмектің қолжетімділігі маңызды. Мәселен емханалардағы кезектерді және жалпы практика дәрігерлерінің жүктемесін азайту үшін олардың қабылдау уақыты 4 сағаттан 6 сағатқа дейін ұзартылды, сонымен бірге дәрігердің күнделікті атқаратын бірқатар функциялары мейіргерге беріліп, мейіргердің дербес қабылдауы енгізілген. Дәрігерге онлайн жазылу енгізіліп, пациенттің маршруты оңтайландырылды. Нәтижесінде қабылдауды күту уақыты 2 аптадан 2-3 күнге дейін қысқарған.
2025 жылдан бастап нысаналы топтың жасын 70-тен 76 жасқа дейін ұлғайта отырып, скринингтік бағдарламалар кеңейтілді. 50-ден 76 жасқа дейінгі ерлер үшін екі жылда бір рет инсульттің даму қаупін ерте анықтауға арналған скрининг енгізіліп отыр. Тимур Мұратов тұрғындардың сауалдарына жауап беріп, кездесуден соң жеке қабылдау өткізді.