«Ұлы дала» шығармашылық байқауының аймақтың кезеңі қортындыланды. «Аманат» партиясының облыстық филиалы ұйытқы болған әдеби дода классик жазушы Әбдіжәміл Нұрпейісовтің 100 жылдық мерейтойы аясында ұйымдастырылып отыр. Байқауға поэзия, проза және балалар әдебиеті жанры бойынша шығармалар ұсынылып, үздік атанған авторлар қаржылай сыйлықтарға ие болды.
«Аманат» партиясының рухани құндылықтарды құнттауды қолға алғанына көп болды. Соның ішінде отандық авторлардың туындыларын дәріптеу мақсатында «Ұлы дала» шығармашылық байқауы бірнеше жылдан бері ұйымдастырылып келеді. Бәсі жоғары әдеби сайыс биыл алғаш рет аймақтық деңгейде өткізіліп отыр. Көрнекті қаламгер Әбдіжәміл Нұрпейісовтің 100 жылдық мерейтойына арналған сайыс шығармашыл жастардың шырағын жаққаны анық.
АЛМАСБЕК ЕСМАХАНОВ – «AMANAT» ПАРТИЯСЫ ОБЛЫСТЫҚ ФИЛИАЛЫНЫҢ ТӨРАҒАСЫ
Бұл конкурс тамыз айында жарияланып, қазан айының 20-сына дейін құжат қабылданды. Конкурсқа 50 адам құжат тапсырды. Қазылар алқасынан облыстық жазушылар одағының төрайымы Қаршыға Құрмашқызы жетекшілік жасап, 11 адамды жеңімпаз деп таныды... 20 аймақтың ішінде алғашқы болып өткізіп жатырмыз.
Жас таланттарды тамыршыдай тануды мақсат тұтқан байқау поэзия, проза және балалар әдебиеті аталымдары бойынша ұйымдастырылды. Әр номинация бойынша қазылар алқасының елегінен өткен авторлар салтанатты кеште марапатталып, қаржылай сыйлықтарға ие болды. Жүзден жүйрік атанғандардың қатарында телеарнамыздың сарапшы-редакторы Елжас Әбділда да бар. Әріптесіміз поэзия бағыты бойынша жүлделі екінші орынды еншіледі. «Ұлтаны болмай ұлтымның, Ұсақталмауға ұмтылдым» деп сөз маржанын терген талант иесінің «Қазақтың ұлымын», «Алғыс», «Оп-оңай» сынды өлеңдеріне жазылған әндер бүгінде ел арасында кеңінен таралған.
Сонымен, бірнеше айға созылған әдеби байқауда әр аталым бойынша 3 орынға жүлде тағайындалды. Поэзия жанры бойынша қазалылық Дина Бөкебай топ жарса, Арал ауданынан қатысқан Биболат Сәтжанның туындысы үздік прозалық шығарма атанды. Ал, балалар әдебиеті бойынша барлық қатысушыға бірдей жүлде ұсынылып отыр.
Салтанатты кеш концерттік бағдарламаға ұласып, өңір өнерпаздары ән шырқады. Сондай-ақ, үздік атанған байқау жеңімпаздары шығармаларын оқып, жұртшылыққа рухани әсер сыйлады.